ಅಕ್ಟೋಬರ್ 1 ರಿಂದ ಜಾರಿಗೆ ಬರುವಂತೆ LPG ಗ್ಯಾಸ್ ಸಿಲಿಂಡರ್ ಬಳಕೆದಾರರಿಗೆ ಆಧಾರ್ ಇ-ಕೆವೈಸಿ (e-KYC) ಪ್ರಕ್ರಿಯೆಯನ್ನು ಕಡ್ಡಾಯಗೊಳಿಸಲಾಗಿದೆ. ಗ್ರಾಹಕರು ಇ-ಕೆವೈಸಿ ಪೂರ್ಣಗೊಳಿಸದಿದ್ದರೆ ಮುಂಬರುವ ದಿನಗಳಲ್ಲಿ ಗ್ಯಾಸ್ ಬುಕ್ಕಿಂಗ್ ಮಾಡಲು ಸಾಧ್ಯವಾಗುವುದಿಲ್ಲ ಹಾಗೂ ಸಬ್ಸಿಡಿ ಸೌಲಭ್ಯ ಕೂಡ ರದ್ದಾಗಲಿದೆ. ಸದ್ಯ ದೇಶದಲ್ಲಿ 27.43 ಕೋಟಿ ಗ್ರಾಹಕರು ಈಗಾಗಲೇ ಇ-ಕೆವೈಸಿ ಮುಗಿಸಿದ್ದು, ಇನ್ನು 3.16 ಕೋಟಿ ಜನರು ಈ ಪ್ರಕ್ರಿಯೆಯನ್ನು ಪೂರ್ಣಗೊಳಿಸಬೇಕಿದೆ.
ಸಾರ್ವಜನಿಕರ ಅನುಕೂಲಕ್ಕಾಗಿ ತೈಲ ಕಂಪನಿಗಳು ಇ-ಕೆವೈಸಿ ಮಾಡಲು ಮೂರು ಸರಳ ಮಾರ್ಗಗಳನ್ನು ಒದಗಿಸಿವೆ:
ಮನೆ ಬಾಗಿಲಲ್ಲೇ ಬಯೋಮೆಟ್ರಿಕ್: ಗ್ಯಾಸ್ ಸಿಲಿಂಡರ್ ಡೆಲಿವರಿ ನೀಡಲು ಬರುವ ವ್ಯಕ್ತಿಯ ಮೊಬೈಲ್ ಆ್ಯಪ್ ಮೂಲಕ ಬೆರಳಚ್ಚು ನೀಡಿ ಇ-ಕೆವೈಸಿ ಪೂರ್ಣಗೊಳಿಸಬಹುದು.
ಗ್ಯಾಸ್ ಏಜೆನ್ಸಿಗೆ ಭೇಟಿ ನೀಡಿ: ಹತ್ತಿರದ ಏಜೆನ್ಸಿಗೆ ನೇರವಾಗಿ ತೆರಳಿ ಇ-ಕೆವೈಸಿ ಮಾಡಿಸಿಕೊಳ್ಳಬಹುದು.
ಆನ್ಲೈನ್ ಸೆಲ್ಫ್ ಇ-ಕೆವೈಸಿ: ಮೊಬೈಲ್ ಆ್ಯಪ್ಗಳ ಮೂಲಕ ಮನೆಯಲ್ಲೇ ಕುಳಿತು ಸ್ವತಃ ಮಾಡಿಕೊಳ್ಳಬಹುದು (ಇಂಡೇನ್ ಗ್ರಾಹಕರಿಗೆ ‘IndianOil One’, ಭಾರತ್ ಗ್ಯಾಸ್ಗೆ ‘Hello BPCL’ ಹಾಗೂ HP ಗ್ಯಾಸ್ಗೆ ‘HP Pay’ ಆ್ಯಪ್ ಬಳಸಿ).
ಒಂದು ವೇಳೆ ನಿಮಗೆ ಸರ್ಕಾರದ ಸಬ್ಸಿಡಿ ಬೇಡವಾಗಿದ್ದರೆ, ಬಯೋಮೆಟ್ರಿಕ್ ಅಗತ್ಯವಿಲ್ಲವೆಂದು ಮೊಬೈಲ್ ಆ್ಯಪ್ ಮೂಲಕ ಸ್ವಯಂ ಘೋಷಣೆ ಮಾಡಿಕೊಳ್ಳಬಹುದು. ಆದರೆ, ಇಂತಹ ಗ್ರಾಹಕರು ಇನ್ಮುಂದೆ ಮಾರುಕಟ್ಟೆಯ ಪೂರ್ಣ ದರ ತೆತ್ತು ಸಿಲಿಂಡರ್ ಖರೀದಿಸಬೇಕಾಗುತ್ತದೆ.
