ಮೆಹಮದಾಬಾದ್ ಸಿದ್ಧಿವಿನಾಯಕನ ವಿಶೇಷತೆ :
ಈ ದೇವಾಲಯವು ಹೊರಭಾಗದಿಂದ ನೋಡಲು ಸಂಪೂರ್ಣವಾಗಿ ಗಣಪತಿಯ ಆಕಾರದಲ್ಲೇ ನಿರ್ಮಿಸಲಾಗಿದೆ. ಅಹಮದಾಬಾದ್ನಿಂದ ಸುಮಾರು 25 ಕಿ.ಮೀ ದೂರದಲ್ಲಿ ವಾತ್ರಕ್ ನದಿಯ ದಡದಲ್ಲಿದೆ. ಇದು ಸುಮಾರು 120 ಅಡಿ ಉದ್ದ, 84 ಅಡಿ ಅಗಲ ಮತ್ತು 71 ಅಡಿ ಎತ್ತರವಿದೆ. ವೃದ್ಧರಿಗೆ ಮತ್ತು ದಿವ್ಯಾಂಗರಿಗೆ ಅನುಕೂಲವಾಗಲು ಲಿಫ್ಟ್, ವ್ಹೀಲ್ಚೇರ್ ಹಾಗೂ ಎಲೆಕ್ಟ್ರಿಕ್ ರಿಕ್ಷಾ ವ್ಯವಸ್ಥೆ ಇದೆ. ಇದರೊಂದಿಗೆ ಫುಡ್ ಕೋರ್ಟ್, ವಸತಿ ಕೊಠಡಿಗಳು ಮತ್ತು ಮಕ್ಕಳಿಗಾಗಿ ಮನರಂಜನಾ ಉದ್ಯಾನವನವೂ ಕೂಡ ಇದೆ.
ಗಣೇಶೋತ್ಸವದಲ್ಲಿ ಹರಿದುಬರುವ ಭಕ್ತಸಾಗರ:
ಸಾಮಾನ್ಯವಾಗಿ ದೇವಾಲಯಗಳಲ್ಲಿ ಗರ್ಭಗುಡಿಯಲ್ಲಿರುವ ಮೂರ್ತಿಯೇ ಪ್ರಮುಖ ಆಕರ್ಷಣೆಯಾಗಿರುತ್ತದೆ. ಆದರೆ ಮೆಹಮದಾಬಾದ್ನಲ್ಲಿ ದೇವಾಲಯವನ್ನು ಪ್ರವೇಶಿಸುತ್ತಿದ್ದಂತೆ ಗಣೇಶನ ದೈವಿಕ ರೂಪದ ವಾಸ್ತುಶಿಲ್ಪವೇ ಭಕ್ತರಿಗೆ ವಿಶೇಷ ಆಧ್ಯಾತ್ಮಿಕ ಅನುಭವ ನೀಡುತ್ತದೆ. ಗಣೇಶೋತ್ಸವದ ಸಂದರ್ಭದಲ್ಲಿ ದೇಶದ ವಿವಿಧ ಮೂಲೆಗಳಿಂದ ಸಾವಿರಾರು ಭಕ್ತರು ಈ ವಿಶಿಷ್ಟ ದೇವಾಲಯವನ್ನು ಕಣ್ಣುಂಬಿಕೊಳ್ಳಲು ಆಗಮಿಸುತ್ತಾರೆ. ಭಕ್ತಿ, ಆಧ್ಯಾತ್ಮಿಕತೆ ಮತ್ತು ಅದ್ಭುತ ಶೈಲಿಯ ವಾಸ್ತುಶಿಲ್ಪದ ಸಂಗಮವಾಗಿರುವ ಈ ಮೆಹಮದಾಬಾದ್ ಸಿದ್ಧಿವಿನಾಯಕ ದೇವಾಲಯವು ಗಣೇಶ ಭಕ್ತರು ಖಂಡಿತವಾಗಿಯೂ ಭೇಟಿ ನೀಡಬೇಕಾದ ದಿವ್ಯ ಕ್ಷೇತ್ರವಾಗಿದೆ.
ಮುಂಬೈ ಸಿದ್ಧಿವಿನಾಯಕ ದೇವಾಲಯದೊಂದಿಗೆ ವಿಶೇಷ ಸಂಪರ್ಕ:
ಮೆಹಮದಾಬಾದ್ನ ಈ ಸಿದ್ಧಿವಿನಾಯಕ ದೇವಾಲಯಕ್ಕೂ ಮುಂಬೈನ ಪ್ರಸಿದ್ಧ ಸಿದ್ಧಿವಿನಾಯಕ ದೇವಾಲಯಕ್ಕೂ ಒಂದು ಅದ್ಭುತ ಧಾರ್ಮಿಕ ಸಂಪರ್ಕವಿದೆ. ಶ್ರೀ ಸಿದ್ಧಿವಿನಾಯಕ ದೇವಸ್ಥಾನ ಮೆಹಮದಾಬಾದ್ ಟ್ರಸ್ಟ್ ಪ್ರಕಾರ, ಮುಂಬೈನ ಸಿದ್ಧಿವಿನಾಯಕ ದೇವಾಲಯದಿಂದ ಶಾಶ್ವತ ಅಖಂಡ ಜ್ಯೋತಿಯನ್ನು (ಜ್ವಾಲೆ) ತಂದು ಇಲ್ಲಿ ಸ್ಥಾಪಿಸಲಾಗಿದೆ. ಇದೇ ಕಾರಣಕ್ಕೆ ಈ ದೇವಾಲಯಕ್ಕೂ ‘ಸಿದ್ಧಿವಿನಾಯಕ’ ಎಂದೇ ಹೆಸರನ್ನಿಡಲಾಗಿದೆ. ಗಣೇಶನನ್ನು ವಿಘ್ನನಿವಾರಕ ಹಾಗೂ ಮಂಗಳಮೂರ್ತಿ ಎಂದು ಪೂಜಿಸುವುದರಿಂದ, ಯಾವುದೇ ಶುಭ ಕಾರ್ಯಕ್ಕೂ ಮುನ್ನ ಇಲ್ಲಿ ಪ್ರಾರ್ಥಿಸಿದರೆ ಸಕಲ ಅಡೆತಡೆಗಳು ನಿವಾರಣೆಯಾಗುತ್ತವೆ ಎಂಬುದು ಭಕ್ತರ ದೃಢ ನಂಬಿಕೆ.
